عفريت الشعب

أحمد غراب

الشعب يريد عفريت المصباح.
أنا أعرف أن عفريت المصباح يطلع لمواطن لجازع طريق
لكن أول مرة اسمع فيها أن فيه عفريت طلع لشعب
عفريت الفرد كان يسبقه دخان كثيف ويقول شبيك لبيك
أما عفريت الشعب اليمني فيخرج من المصباح بزامل ثم يقرح واحد وعشرين طلقة رصاص في الهواء ويقول جباك يا ذاك
– الشعب: اشتي تحول اليمن إلى يابان
– العفريت: وتشتي اليابان بقات وإلا بدون¿
– بقات
– وطوكيو قصدي صنعاء تشتيها بقبائل أو من غير¿
– بقبائل
– والسلاح مسموح وإلا ممنوع¿
– مسموح
– والمدارس بسبورة وإلا بآيباد¿
– بآيش ما أدى الله
– والجهال يقفزوا من فوق سور المدرسة وإلا يخترعوا آلات
– يقفزوا ويخترعوا
– والمدرسين تشتيهم بحاسوب وإلا بعسيب وجنبية¿
– بعسيب وجنبية
– والغداء تشتيه عصيد وإلا أعشاب بحرية¿
– عصيد حمراء وزوم
– والشوارع فيها سيارات وموترات مثل اليمن وإلا سياكل بس مثل اليابان¿
– سيارات وموترات
– وتشتي موتر أبليس في طوكيو وإلا ماتشتيه¿
– أعوذ بالله ما نشتي إلا أمن يقط المسمار
– والزبيب تشتيه صيني وإلا يمني¿
– بلدي
– والعنب تشتيه ياباني وإلا من بني حشيش
– من بني حشيش
– والرمان¿
– صعدي
– والحكومة¿
– اشتيها كلها ياباني
– والمسؤولين¿
– يابانيين كلهم فطس ما اشتي واحد منخر
– ووزير الكهرباء¿
– ياباني
– وكلفوت¿
– خليهم صيني
– وتشتي حرب في صعدة وإلا ما تشتي¿
– اشتي قات عماري وبلوط شابع حروووووب
– ومؤتمر حوار¿
– اشتي فرصة عمل
– والمغتربين تشتيهم مكفلين وإلا مرحلين¿
– اشتيهم كلهم مكفلين داخل بلدهم اليمن
– ومكافحة الفساد تشتيها يمني وإلا ياباني¿
– ياباني
– والرقابة
– ياباني
– والمحاسبة
– ياباني
– وصاحب الباص تشتيه يمني وإلا ياباني¿
– يمني
– والمستشفيات والدكاترة¿
– كلهم ياباني
– والبناشرة¿
– كلهم ياباني
– والشعب¿
– قصدك أنا¿
– أيوه
– أو تشتي تقلبني ياباني¿
لا لا كيف شاكيف وأطعم القات وأنا ياباني¿
لا لا خليني يمني بغباره
– تعرف علاء¿
– علاء من¿
– على غيري
روح دور لك عفريت غيري
ما ينفع نغير اليمن ونقلبها اليابان
إلا إذا غيرنا اليمنيين وقلبناهم يابانيين.
أذكروا الله وعطروا قلوبكم بالصلاة على النبي
اللهم ارحم أبي وأسكنه فسيح جناتك وجميع أموات المسلمين